Mette Frederiksen, forsætisráðfrú, fer í morgin at boða frá partvísum stongsli í Keypmannahavn, Odense og Aarhus eins og í fleiri kommunum í høvuðsstaðnum og á Sælandi.
Tað sigur hon í eini video á Facebook í kvøld.
Forsætisráðfrúan fer eisini at siga meira um, hvørjar avmarkingar, ið fara at vera galdandi í øllum landinum á jólum, nýggjárinum og »sum so eisini restina av vetrinum«, sigur hon í videonum.
Sambært Mette Frederiksen fer eisini at vera lutvísur stongsul í nøkrum økjum, tí tað er har, at smittan er meist útbreidd í løtuni.
– Við støði í tilmælum, vit fáa frá myndugleikunum, hava vit um vikuskiftið fyrireikað ein landafrøðiligan, miðvísan og lutvísan stongsul. Tíverri.
– Tað verður galdandi í teimum pørtum av landinum, har smittan er mest útbreidd. Tað fevnir um Keypmannahavn, Odense og Aarhus og fleiri kommunur í høvuðsstaðnum og á Sælandi, sigur hon.
Mette Frederiksen nevnir ikki ítøkiliga, hvørji tiltøk talan verður um.
Men hon sigur, at vit skulu venja okkum við at síggja færri fólk.
– Vit skulu hava betri tamarhald á smittuni, áðrenn tað verður jólaaftan. Tað fer at krevja nógv av okkum øllum.
– Um vit hitta færri fólk, so verður tað tryggari at kunna savnast við okkara nærmastu jólaaftan, sigur Mette Frederiksen og leggur afturat:
– Vit verða noydd at spyrja okkum sjálvi: Skulu vit hittast? Og ikki – hvussu skulu vit hittast?
Fyrr í dag skrivaði eisini heilsumálaráðharrin Magnus Heunicke á Facebook, at nýggjar avmarkingar eru á veg fleiri staðni í landinum.
– Ferð merkir nakað, tá vit skulu stríðast ímóti smittuni. Økingin, sum var fyri viku síðani í 18 kommunum í og nærindis høvuðsstaðnum, kunnu vit nú staðfest er á veg fleiri staðni.
Heunicke hevur sent boð eftir framsøgufólkunum í heilsumálum at koma á fund í morginári um møguleikan fyri nýggjum tiltøkum. Sambært fleiri miðlum er fundurin klokkan 8:15 danska tíð.
Beint eftir verður ein fundur við borgarstjórar og regiónsformenn í »teimum ávirkaðu økjunum«, skrivar ráðharrin. Hann greiðir ikki nærri frá, hvørji øki talan er um.
Tíðindafundurin verður í Forsætismálaráðnum í morgin fyrrapart. Neyva tíðspumktið er ikki greitt enn.
/ritzau/
