Blokkfloytusnillingurin Michala Petri er útvald sum "P2 Kunstner 2019" av donsku útvarpsstøðini P2, sum er útvarpsstøð hjá Danmarks Radio. Tað skrivar DR í dag.
- Michala Petri er eitt fyribrigdi í donskum tónleiki. Sum blokkfloytuúrmælingur hevur hon í hálvthundrað ár útforskað blokkfloytuna, og við ótroyttiligari orku hevur hon lagt seg á odda í menningini av leikskránni hjá ljóðførinum, sigur P2-redaktørur Esben Tange við DR.
Hennara nýggja heiti sum P2 Listafólk fer at geva henni fleiri konsertavtalur o.a. við DR. Hon sleppur at luttaka í ymsum sendingum á P2, og DR fer eisini at senda fleiri av konsertum hennara í sjónvarpinum.
- Eg eri glað og lukkulig at verða útvald til P2 Listafólk 2019 og fyri at fáa størri tilknýti til DR, sigur hon í samrøðu við DR.
Í fjør var tað Den Danske Strygekvartet, ið fekk heiðurin. Oddamaðurin her er hálvføroyski Rune Tonsgaard Sørensen. Í ár er P2 listafólkið so aftur ein við tilknýti til Føroya. Michala Petri hevur føroysk hálvsystkin og er gift við føroyska Sunnleif Rasmussen. Hon er annars fødd og uppvaksin í Danmark, áðrenn hon fór til Týsklands at ganga í skúla sum smágenta.
Í síðsta mánaða kundi Michala Petri hátíðarhalda sín 60 ára føðingardag og tað, at hon hevur verið 50 ár á pallinum.
14. februar 2019 verða P2 virðislønirnar handaðar.
