Tað var ikki eitt rætt dømt brotsspark, tá ið West Bromwich nýggjársaftan fekk tillutað eitt brotsspark í evstu løtu ímóti Arsenal í Premier League. Jay Rodriguez gagnnýtti brotssparkið, og so endaði dysturin við 1-1-javnleiki.
Arsenal-venjarin, Arsene Wenger, var frá sær sjálvum inn á dómaran, Mike Dean, sum dømdi brotsspark eftir at bólturin stakk í hondina á Calum Chambers, og Wenger fekk seinni tríggjar dystir leikbann og smáar 340.000 krónur í bót.
Mike Dean hevur viðgingið, at brotssparkið ikki var rætt dømt. Tað avdúkar dómaraleiðarin, Mike Riley.
- Eg veit, at hann er ein ógvuliga erligur maður, og hann veit, at hann tók feil, sigur Mike Riley í samrøðu við Daily Express í sambandi við at Premier League-dómarar í næstum fara at royndarkoyra sjónbandahjálpina, ta sokallaðu Video Assistant Referee-skipanina.
- Hann dømdi brotssparkið sambært tí, sum hann sá á vøllinum, har ein armur nærkaðist bóltinum, men úr einum øðrum sjónarhorni vísti tað seg at vera beint øvut, sigur Mike Riley.
