*føddur 25. februar 1921 – deyður 28. februar 2014
Gotfred var borin í heim á Ryggi í Miðvági, sonur Onnu Elisabeth og Heina Joensen.
Hann var giftur Dusinu f. Petersen í Sandavági og fingu tey 3 synir, Sámal Jákup, Heina og Ólavur.
Gotfred fór áðrenn kríggið til Danmarkar í skræddaralæru. Heimafturkomin fór hann at seyma klædningar í kjallaranum á Ryggi og hevði hann fleiri fólk í arbeiði hesa tíðina til hann sjálvur bygdi sær hús og fór at handla í niðaru hæddini, tá liðugtseymaðir klædningar komu til landið. Handilin hevði eitt breitt úrvæl frá matvørum til toyvøru, og var konan honum ein dyggur stuðul í hesum arbeiði. Tey høvdu eisini fleiri fólk í arbeiði og harafturat bensinstøð.
Gotfred stovnaði eisini Turkihúsið í Miðvági saman við D. P. Danielsen, har fiskur varð saltaður. Arbeiðsfólkið koyrdi hann í lastini til og frá døgurða við lastbili sínum, og her skaffaði hann eisini mongum kvinnum arbeiði.
1955 keypti P/F Gotfred Joensen útróðrarbátin Lækkaklett VA6, og í 1970 kom Vørðuklettur VA60, og her var arbeiði til nógvar hendur, til teir vórðu seldir ávika-vist í 1974 og 1976. Manningarnir trivust væl umborð og vóru fleiri við øll árini. 1975 kom V. U. Hammerhaimb VA 165 í flotan hjá P/F Gotfred Joensen fram til 1981 og nýggi Lækkaklettur, nýbygningur úr Pólandi kom í 1976 og varð seldur aftur í 1979.
1975-1976 var Gotfred borgmeistari í Miðvági, har hann arbeiddi fyri, at umstøðurnar at hava skipini liggjandi við bryggju í øllum veðri vóru munandi bøtt um við pierinum, sum bleiv bygdur saman við Sandavágsmonnum. Hetta var eitt av hansara hjartamálum.
Somuleiðis var hann primus motor í at seta flakavirkið í Miðvági á stovn eisini saman við sandavágsmonnum. Hann setti nógvan pening í flakavirkið og arbeiddi sum stjóri ókeypis í nøkur ár fyri at fáa hetta at ganga, tí hann helt, at brúk var fyri hesum arbeiðsplássum.
Gotfred var eisini nevndarlimur í Føroya Banka og Fiskasøluni nøkur ár.
Gotfred og Dusina vóru fyri tí stóru sorg at missa sonin, Heina, og var tað teimum ein dyggur smeitur.
Gotfredi untist at blíva 93 ár, hóast hann fekk blóðtøpp sum 60 ára gamal, megnaði hann restina av livitíðini at vera stjóri í sp/f Gotfred Joensen, raskur til tað síðsta.
Saknurin er stórur, serliga hjá tær Dusina, synunum, abbabørnunum og oldurabbabørnunum.
Friður verið við minninum um verfaðirin og fari eg altíð at minnast hendan álvarsama mannin við tí hjartaliga látrinum. Hann segði tingini bart út, tó við einum skálkabrosi. Saman við konuni var Gotfred eitt satt arbeiðsgrev.
Marna
