Tíðindaskriv, Javnaðarflokkurin:
Heðin Mortensen er millum drúgvastu fólkavaldu í landinum, og var fyrstu ferð valdur í Tórshavnar býráðið í 1972. Fyrstu árini umboðaði hann uttanflokkalistan hjá Petur í Gong. Frá 1988 varð hann valdur fyri Sambandsflokkin, men kom í 2004 heim aftur í Javnaðarflokkin, har hann í roynd og veru byrjaði sína politisku karrieru sum blaðungur medstovnari av ungmannafelagnum hjá Javnaðarflokkinum, SU. Umframt býráðið, hevur hann eisini umboðað Javnaðarflokkin í løgtinginum og sum landsstýrismaður.
Hóast Heðin framvegis er virkin í politikki, nú sum varaborgarstjóri, ynskir flokkurin á hendan hátt at takka fyri drúgva og týðandi takið, sum Heðin longu hevur tikið fyri flokkin, serliga sum borgarstjóri í høvuðsstaðarkommununi.
Móttøkan verður í Javnaðarhúsinum í Steinatúni fríggjadagin 31. januar klokkan 15-18. Javnaðarhúsið er í Niels Finsensgøta 14, inngongd aftanfyri í erva.
Øll eru hjartaliga vælkomin.
