Í tíðindaskrivi í morgun boðar Navigare frá, at felagið keypir tvey skip frá Arklow Shipping í Írlandi.
Talið á skipum hjá felagnum veksur soleiðis úr 11 upp í 13, nú Hav Brim og Hav Sund koma í flotan aftrat, ávikavist í apríl og juni í ár.
Skipini eru bygd í 2008 og koma at lasta 4600 tons.
Við hesum keypi ger Navigare samstundis sína størstu íløgu í søgu felagsins. Felagið sigur, at avgerðin er strategisk og er ein liður í at endurnýggja flotan tey komandi árini.
- Vit fara inn í framtíðina við positivum huglagi og fleiri spennandi verkætlanum, hóast óvissuna, ið hevur verið seinastu árini - og nú í tí spentu støðuni, sum er millum Russland og Ukraina, sigur felagið.
Um skipini, sum Navigare nú hevur keypt aftrat, verður sagt, at tey eru 89, 95 metrar long og 14, 4 metrar breið. BT er 2998 tons, og motororkan er 1800kW.
