Nú mentanarvika er í Runavíkarøkinum hesa vikuna, verður í kvøld skipað fyri tiltakinum, tey rópa Trumfa.
Hetta er, sum fyrireikararnir siga, eitt kvøld við lívligari mentan og litríkari list og tað, sum fer at seta sín serliga dám á hetta kvøldið, er, at fleiri handlar í Runavíkar-økinum fara at hava opið heilt til á midnátt.
Men, handlarnir fara ikki bara at hava leingi opið. Teir fara eisini at hava nógv góð og forvitnislig tilboð - og tímatilboð, sum tey rópa tað.
Ein serstøk skrá er løgd fyri júst hetta kvøldið, sum byrjar nú klokkan 16 við, at Sjókafé'in letur upp við leskiligari matarskrá.
Her verður eisini fiskamarknaður í mentanartjaldinum á Glyvrum - og áhugavert bókmentakvøld við forlagnum Vencil á Bókasavninum við Løkin.
Í kvøld verða eisini listaframsýningar, fyrilestrar, mótasýning, live-tónleikur og føroyskur dansur.
Hæddarpunktið í kvøld verður útgávukonsertin hjá bólkinum Týr, sum byrjar í Løkshøll klokkan 22.
Skráin fyri mentanarvikuna kann síggjast á www.mentanarvikan.fo
