Hóast Javnaðarflokkurin og Tjóðveldi fyri 43 árum vóru so ósamdir við Fólkaflokkin um uttanlandssiglingina, at samgongan slitnaði, tí Fólkaflokkurin vildi hava siglingina á privatar hendur, so eru tað júst Javnaðarflokkurin og Tjóðveldi, sum nú selja tað síðsta, sum landsstýrið eigur í P/F Smyril Line.
Løgmaður hevur fingið heimild í fíggjarlógini fyri 2023 at selja partabrøvini, sum landið eigur í P/F Smyril-Line. Í hesum sambandi, hevur Løgmansskrivstovan sett tænastuna í útboð á keypsportali landsins.
Landskassin eigur 16 prosent av partapeninginum í P/F Smyril Line. Stóri partaeigarin er P/F 12.11.11, sum eigur 59 prosent av partapeninginum. Framtaksgrunnur Føroya eigur 6 prosent. So eru 19 prosent, sum eru býtt út á smærri partaeigarar, sum uttan iva eru fleiri túsund í tali. Tá Smyril Line varð stovnað í 1982 vórðu tað mong, sum settu partapening í felagið, sum gav teimum avsláttur av ferðaseðlum. Hóast partapeningurin er niðurskrivaður fleiri ferðir, so hava tey gomlu partabrøvini virði enn.
Høvuðseigarin í Smyril Line, P/F 12.11.11, er felag, sum norska Havila Holding eigur 50 prosent av. P/F Sæborg eigur 34 prosent og P/F Sjóborg eigur 14 prosent.
Eginognin í Smyril Line er sambært seinasta ársroknskapi 448,9 milliónir krónur. Landskassans partur av eginognini er 71,7 milliónir krónur.
