Føroyski landsliðsmálverjin, Annika Fríðheim Petersen og liðfelagar hennara í Nykøbing Falster vóru fyri stórtapi í bestu donsku hondbóltsdeildini í kvøld.
Nykøbing Falster tapti á útivølli 25-33 fyri Horsens.
Í fyrra hálvleiki leikaði javnt á. Støðan var javnleikur 13-13 í steðginum, men í seinna hálvleiki gekk av skriðuni hjá Nykøbing Falster.
Annika bjargaði tveimum av 11 málroyndum hjá Horsens, tá hon var á vøllinum. Kappingarneytin hjá Anniku, Cecilie Greve bjargaði sjey av 30 málroyndum hjá Horsens.
Nykøbing Falster er nummar fýra í deildini við 12 stigum. Tvey stig eru upp til fremstu liðini, Esbjerg og Ikast, ið hava 14 stig hvør.
Komandi týskvøld hevur Nykøbing Falster heimadyst móti Odense.
