Og so koma politikarar og siga, hvussu neyðugt tað er, at vit øll ofra okkum og arbeiða nøkur ár eyka.
Tað merkir, at fleiri túsund føroyingar missa ta pensjón, sum teir hava slitið fyri alt lívið. Ítøkiliga merkir tað, at tann, ið er føddur eftir 1. juli í 1957 skal rinda gildið við at arbeiða eitt hálvt ár eyka. Tann, ið er føddur eftir 1962 skal gjalda við at arbeiða eitt heilt ár eyka.
Og tað er ikki nóg mikið, siga tey klóku nú. Pensjónsaldurin skal hækkast meira, og hann skal hækkast skjótari.
Men tað helt merkiliga við øllum hesum er, at politikararnir sjálvir, sum taka hesar avgerðir, og vilja hava okkum øll at ofra okkum meira – teir skulu ikki gjalda. Tí pensjónsaldurin hjá politikarunum hækkar ikki!
Eingin politikari hevur nevnt tað við einum orði, at »vit mugu ganga sum fyrimynd og hækka okkara egna pensjónsaldur«. Løgtingsfólk hava verðins bestu pensjónsskipan. Og sjálvandi hava tey tað, tí tey hava sjálvi gjørt hana! Og fólkið rindar hana!
Vanliga fólkið, sum eisini hevur rindað til sína egnu pensjón at fáa, tá tey fylla 67, mugu bíða. Tey fáa heldur ikki sínar egnu pengar, sum tey sjálv hava goldið, fyrr enn í fyrsta lagi eitt ár seinni, tí at Løgtingið hevur samtykt tað.
Men sjálvi ofra tingfólk seg ikki meira fyri felagskassan. Tvørtur ímóti skulu tey varðveita sína feitu pensjón, sum tey í summum førum fáa, tá tey eru 60 ár, og í ringasta føri mugu bíða við, til tey eru 67. Ikki 67,5 ella 68. Og tey skulu heldur ikki slíta í tí eitt heilt arbeiðslív fyri at fáa sína fullu pensjón, men bara í 16 ár.
Okkara boð til allar politikarar í Føroyum: Sópið fyri egnar dyr fyrst. Vísið at tit meina tað við fyrst at broyta tykkara egna pensjónsaldur. Broytið lógina um samsýning og eftirløn tingmanna soleiðis, at eingin tykkara fær pensjón frá Løgtinginum, fyrr enn tit eru fylt 68 ár. Gera tit ikki tað, so meina tit tað ikki álvara, men vísa eitt óhugnaligt kraddaralyndi heldur enn samhaldsfesti.
Ikki sørt at tingfólk hava gloymt, at tey eru fólksins tænarar – og ikki øvugt.
