Uppskotini snúgva seg um ymsar broytingar í Stýriskipan Føroya. Ein broyting er um fólkaatkvøðu, annur um nýtt løgmansval eftir hvørt løgtingsval – og um almennar nevndarhoyringar, meðan tann triða broytingin snýr seg um betri møguleikar um alment innlit.
Hetta er trý sera áhugaverd og viðkomandi mál. Men tað tykist kortini ikki, sum um Tjóðveldi hevur lagt serliga stórt arbeiði í fyrireikingarnar til málið. Tá Gunvør Balle legði málið fyri tingið, greiddi hon millum annað frá, at vóru hesi uppskot galdandi lóg, so hevði ein fókaatkvøða kunna steðgað málinum um forskatting av pensjónunum.
Høgni Hoydal var eisini sera frustreraður, tí tá hann kom á røðarapallin, tímdi eingin at lurta eftir honum – hann tosaði so at siga fyri tómum tingsali.
Men tað er so nógv, sum bendir á, at tað ikki bara eru tey í Tjóðveldi, sum var illa fyrireikað. Eisini samgongufólk, sum til dømis løgmaður og Helgi Abrahamsen.
Eitt sindur pínligt er tað, at framsøgufólk Tjóðveldisins nýtir júst málið um forskatting sum dømi um, hvat lógin kundi verið nýtt til. Tí í grein 1 stk. 6 í uppsotinum stendur soleiðis:
Uppskot til lóg um fíggjar-, lønar- og skattamál og lógir um útinning av galdandi millummlanda sáttmálum kunnu ikki leggjast til fólkaatkvøðu.
Tað skjýtur grundgevingina hjá Gunvør Balle niður. Eins og tað heldur ikki bendir á væl fyrireikað lógarsmíð hjá Tjóðveldi, at tey ikki ein gang sjálvi kenna innihaldið og avleiðingar av sínum egnu uppskotum.
Men løgmaður og Helgi Abrahamsen hava heldur ikki fyrireikað seg upp á viðgerðina av uppskotinum, tí báðir nevndu, at hendan lógin kundi havt steðgað lækkingini av blokkstuðlinum úr Danmark í 2002.
Løgmaður segði soleiðis á Facebook mikudagin:
»Lat meg geva Tjóðveldi rætt í einum. Um vit høvdu minnilutaverju í 2002, tá blokkurin varð skorin í óðum verkum, so høvdu vit í dag havt 634 mió kr meira á inntøkusíðu landsins hvørt ár.«
Eitt sindur pínligt at síggja, hvussu tilvildarligt lógararbeiði á okkara høga tingi kann vera.
