Serlga er tað alifiskurin sum er okkara størsta útflutningsvøra, og eftir hana er tað uppsjóvarfiskurin.
Eisini er tað áhugavert, at orsøkin til vøksturin ikki er økt útflutningsnøgd, men øktur prísur.
Slík tíðindi bera boð um uppsving í samfelagnum, og tað eiga vit øll at frøast um. At fleiri pengar verða tjentir inn í føroyska búskapin kann geva øllum búskapinum tað sparkið, sum skal til fyri at seta meira gongd á, go tí er tað av týdningini, at vit nú duga at húsast á skynsamasta hátt.
Men vit síggja ikki hetta uppsvingið í øktari nýtslu, sum vit áttu og fegin vildu sæð.
Sambært stjóranum á Hagstovuni, Sigurð Poulsen, so kann orsøkin vera, at fólk ikki reiðiliga tora at brúka pengar. Hann heldur, at hetta kann vera tí, at fólk enn merkja avleiðingarnar av kreppuni. Onkur hevur sett seg fyri ov dýr sethúsalán og sita við húsum, sum hava minni virði í dag, enn keypsprísurin var. Onnur hava kanska gjørt íløgur á fíggjarmarknaðinum, sum tey hava brent seg av.
Spurningurin er so, hvussu vit fáa fólk at brúka fleiri pengar – uttan tó at brúka yvir evni. Vit hava nógvar vinnur í Føroyum, bæði innan handil og tænastu, sum hava harðliga brúk fyri størri eftirspurningi, og sum líða undir tí, tá sparingarnar vara ov leingi.
Her eigur samfelagið eisini sína uppgávu. Landsstýrið legði nógv fyri til tess at veita teimum hægru inntøkunum skattalætta. Hetta skuldi seta ferð á búskapin. Ein pástandur, sum ikki er prógvaður, og sum neyvan kann fremjast í verki uttan so, at vanligi borgarin eisini fær skattalætta.
Samgongan hevur tosað um skattalætta til tær lægru lønirnar, men enn er ikki greitt, hvussu hesin skattalættin skal fíggjast. Skattalættin til hægru lønirnar verður fíggjaður við forskattingini av pensjónunum – og soleiðis eru øll við til at fíggja – eisini tey, sum als ongan skattalætta hava fingið.
Tað verður so uppgávan hjá samgonguni at finna útav, hvussu hesin skattalættin skal fíggjast, so hann ikki verður samtyktur í óðum verki beint áðrenn valið.
Tað er at fegnast um, at tað gongur betur í samfelagnum. Avbjóðingin er tó, at øll fáa part í hesi framgongd.
