Tað er eyðsæð fyri øll, at tað ber ikki til at bakka aftur eina slíka avtalu, sum løgtingið og landsstýrið gjørdu við stjórnina í 2003, tá blokkurin varð skorin.
Men løgmaður vildi ikki viðganga, at dysturin var taptur. Hann segði seg hava avtalað við Helle Thorning-Schmidt, at stjórnin og landsstýrið skuldu fara undir konkretar samráðingar í heyst. Kaj Leo Johannesen segði seg hava avtalað hetta á fundi við stjórnina 16. januar í ár.
– Tak ikki feil. Vit fáa hesar 200 milliónirnar. Ikki fyrsta árið, men næsta, triðja ella fjórða árið. Tað skulu samráðingar til, og vit avtalaðu á fundinum i gjár, at tað verða konkretar samráðingar til heystar. Ikki bara brævaskifti, ikki bara telefonsamskifti, sum tá blokkurin varð skorin 600 milliónir.
Soleiðis segði løgmaður við Deg & Viku 17. januar í ár.
Men nú stjórnin er um at verða liðug við fíggjarlógaruppskotið, sum skal samtykkjast í Fólkatinginum, so sæst, at einki er um hetta, sum løgmaður segði. Sambært uppskotinum til fólkatingsfíggjarlógina verður blokkurin til Føroyar 624,5 milliónir næsta ár – í 2013. Tað verður hann eisini í 2014 og í 2015 sambært uppskotinum, sum liggur í Fólkatinginum.
Og samráðingar hava ongar verið. Løgmaður sjálvur hevur einki gjørt við málið. Hann hevur latið tað upp í hendurnar á Jørgen Niclasen – og tað er sum at lata revin ansa høsnunum, tí Jørgen Niclasen og Fólkaflokkurin hava alment boðað frá, at tey halda einki um hesa ætlan hjá løgmanni og Sambandsflokkinum.
Og Jørgen Niclasen hevur einki gjørt við málið. Ongar samráðingar hava verið um at hækka blokkin, so sum løgmaður segði, at hann og stjórnin avtalaðu 16. januar í ár. Jørgen Niclasen sigur við blaðið í dag, at vit brævaskifta við donsku stjórnina í hesum døgum. Galdandi avtala er bara fyri 2012, og tí skal nýggj avtala gerast – eisini um tað, at blokkurin bara skal hækkast við prístalsjavning sum í ár.
So er spurningurin, um talan er um vánaligt politiskt handalag – ella talan er um bluff. Í øllum førum ger samgongan tað øvugta av tí, sum løgmaður lovaði – og eftir øllum at døma trýr løgmaður ikki ein gong sær sjálvum í hesum máli.
