Sjálvt um Fólkaflokkurin hevur fingið nýggjan formann, at tingfólk hjá Fólkaflokkinum sleppa at atkvøðu eftir egnari sannføring í etiskum málum, og sjálvt um flokkurin hevur boðið Anniku Olsen vælkomnari aftur í flokkin, so hevur friður ikki lagt seg um flokkin enn.
Fyrr í dag frættist, at formaðurin í ungmannafelag Fólkafloksins, Huxa, hevur lagt frá sær.
Og nú frættist, at øll nevndin í Havnar Framburðsfelag hevur lagt frá sær.
Rói B. Poulsen, sum er formaður í Havnar Framburðsfelag váttar, at hann og øll nevndin hava lagt frá sær
– Eg kann vátta, at øll nevndin er farin frá, og at tað er í sambandi við tað, sum er farið fram í flokkinum, men annars havi eg ikki fleiri viðmerkingar, sigur Rói B. Poulsen.
Hini í nevndini í Havnar Framburðsfelag um framt formannin Róa B. Poulsen, eru:
Regin W. Dalsgaard, næstformaður
Helgi D. Michelsen
Birgir Nielsen
Tað hevur ljóðað í allan dag, at Annika Olsen skal stilla upp fyri Tjóðveldi til løgtingsvalið. Sjálv hevur Annika Olsen ikki svarað í dag, og í Tjóðveldi eru tey ikki so tíðindafróð um hesi tíðindi.
Men staðfestast kann, at niðurbræðingini í Fólkaflokkinum er ikki steðgað, sjálvt um floksleiðslan bakkaði á fundi í gjárkvøldið frá kravinum um at halda Anniku Olsen uttan fyri Fólkaflokkin, og sjálvt um flokkurin nú fer at loyva tinglimum floksins at atkvøða eftir egnari sannføring í etiskum málum.
