Vágs Kommuna bjóðar borgarum ókeypis plantupakka. Í pakkanum eru tríggjar plantur.
Húsarhald í Vági fáa møguleika at ogna sær plantupakka frá kommununi. Talan er um avmarkaða nøgd, og tí er bert ein pakki til hvørt húsarhald, skrivar vagur.fo.
Í plantupakkanum eru:
Tasmansk fjallamynta (Prostanthera cuneata): Lágur, veturgrønur runnur. Smá bløð, ið hava góðan anga av myntu. Heilt ljósabláar blómur í juni. Tolir nakað av skugga, men blómar best í góðum sólargangi. Egnar seg væl sum kantplanta á grótlaðingum og í skráum.
Hebe – Hebe ‘Cockayniana’: Lágur, tættvaksin og veturgrønur runnur. Nógvar hvítar blómur tíðliga á sumrinum. Rættiliga harðfør.
Rósumyrta (Leptospermum humifusum): Miðalhøgur veturgrønur ella hálvveturgrønur runnur. Kann skerast til lítið træ. Smáar, hvítar blómur. Smávaksin, leðurkend bløð, brúngrøn á liti. Skal helst hava lívd fyri høgættini.
Plantupakkin kann heintast uttanfyri Miðlatún frá týsdegnum 14. apríl.
Á heimasíðuni hjá Vágs kommunu, vagur.fo, ber til at skriva seg á lista til plantupakkan.
