Óli Mittún bleiv avgjørt eina stóra hondbóltsuppliving ríkari í dag.
Í dag spældi hann saman við javnaldrunum í Sävehof finalu um svenska meistaraskapið fyri U18-lið frammanfyri nærum 2.700 áskoðarum.
Við at skjóta 11 mál og leggja upp til mál hjá øðrum gekk Óli undan í greiða 30-20 finalusigrinum á Alingsås.
Stóri svenski hondbóltsmiðilin, Handbollskanalen skrivar, at Óli er heilt greitt tann besti leikarin í Svøríki í hesum aldursbólkinum. Óli var eisini valdur til MVP (Most Valueable Player) í kappingini.
Hetta eru spennandi dagar hjá Óla. Hann hevur vunnið seg til EM-endaspælið saman við føroyska A-landsliðnum. Hann er nú svenskur U18-meistari, og hann hevur enn møguleika at gerast meistari í bestu svensku hondbóltsdeildini. Og í summar bíða HM-endaspøl fyri bæði U21 og U19-landslið.
Í annaðkvøld klokkan 18 spæla Óli, Elias og liðfelagarnir í Sävehof aðru hálvfinaluna móti Ystad. Sävehof er á odda 1-0 í hálvfinaluuppgerðini, har spælt verður best av fimm dystum.