Í dag fall loksins dómur í trætuni millum Olivur Joensen, blaðstjóra á Norðlýsinum, og løgregluna.
Ein várdag í fyrraárið varð Olivur Joensen steðgaður av løgregluni í eini paragraff 13 kanning í Klaksvík og ákærdur fyri at hava tosað í fartelefon, meðan hann koyrdi.
Olivur Joensen haldur fast við, at hann als ikki tosaði í fartelefon, men einans klóraði sær í oyranum. Hesa søguna hevur hann borið fram alla tíðina, og í morgun náddi hon líka í Føroya rætt, tí Olivur Joensen hevur noktað at taka við bótini.
Dómarin valdi tó at seta sítt álit á frágreiðingina frá løgreglufólkunum, heldur enn søguna hjá Olivuri Joensen, og endin var tí, at hann varð dømdur at rinda bótina.
Sambært skrivi, sum Olivur Joensen sjálvur hevur skrivað á Norðlýsinum fyrrapartin, umhugsar hann at kæra dómin til landsrættin.
