Orkis í Saltangará er elsti núverandi blómuhandil í Føroyum, og hin 3. apríl í ár hevði handilin 40 ár á baki.
Navnið hevur handilin eftir føroysku orkidé’ini, børkubónda, og á latínskum kallast plantuættin, sum børkubóndi er av, orchis.
Orkis læt fyrstu ferð dyrnar upp hin 3. apríl fyri 40 árum síðan á Heiðavegi í Runavík.
Tað var Sámal Erik Djurhuus, sum læt handillin upp. Seinni kom maki hansara, Anette Sonne, at arbeiða har saman við honum.
Í dag eiga Beinta Vilmundsdóttir og maki hennara, Fróði Poulsen, fyritøkuna, sum tey keyptu í september í fjør.
Beinta hevur lært til blómubindara í Orkis og stutt eftir, at hon var útlærd, keyptu hon og makin handilin.
- Vit hava eitt breitt vøruúrval og nógvar vørur av góðari góðsku. Vit ganga høgt upp í haldføri, soleiðis at keyparin fær meira gleði av tí, sum keypt verður.
##med2##
Eigarin sigur, at Orkis eisini gongur høgt upp í umhvørvið, og tey royna at minka um nýtsluna av óneyðugum pakkitilfari.
- Vit eru soleiðis farin at pakka blómutyssi inn í pappír ella endurnýtslupappír, sigur Beinta Vilmundsdóttir.
Í samband við merkisdagin, nú blómuhandilin hevur 40 ár á baki – og 40 ára royndir aftan fyri seg – bjóðar Orkis í dag kaffi, køkur og góð tilboð, og handilin hevur opið í dag til klokkan 16.
