HB hevur av álvara fingið um endan. Í dag vann HB 4-1 á útivølliimóti EB/Streymi, sum fyrr í ár var um reppið at vinna í Gundadali, tá ið EB/Streymur var frammanfyri 2-0, inntil tað restaði eitt korter. Tað endaði 2-2.
Tað var neyðugt at leggja góða løtu aftrat fyrra hálvleiki, og tað var í tíðini, sum dómarin hevði lagt aftrat, at HB skoraði bæði til 1-0 og 2-0.
Í tí fyrra førinum var tað Daniel Johansen, sum umsetti brotsspark til 1-0, og so var tað Adrian Justinussen, sum við beinleiðis frísparki skoraði fyri fimtu ferð í ár.
At fáa tvey mál ímóti sær lítlu løtuna undan steðginum var øgiligur smeitur hjá EB/Streymi, og ilt varð verri, tá ið Pætur J. Petersen 10 minuttir eftir steðgin økti um munin til 3-0. Dan í Soylu átti uppleggið.
EB/Streymur vísti góðan hugburð, og tað kendist sum um, at møguleiki var at fáa um endan, tá ið innskifti Elias El Moustage minkaði um munin til 3-1 eftir uppspæl í høgru og sending frá innskifta Jákupi Hummeland. Hetta var í 67. minutti, og heimaliðið royndi at pressa um munin fyri at fáa enn meiri spenning í.
Eitt korter undan leikloki hvarv allur spenningur, tá ið Pætur J. Petersen fekk fatur á bóltinum, tá ið verjan royndi seg við afturlegging og so var 4-1 og ballið buðið. Nú hevur Pætur J. Petersen skorað sjey mál í landskappingini. Fyri smáum tveimum vikum síðani skoraði Pætur J. Petersen bæði málini, tá ið HB vann 2-1 á heimavølli ímóti Víkingi, og aftur í dag skoraði hann tvey mál.
HB er á triðja plássi við 37 stigum, og EB/Streymur er á fimta plássi við 24 stigum.
Næsti dystur hjá HB verður næsta sunnudag á heimavølli ímóti Skála.
Næsti dystur hjá EB/Streymi verður næsta sunnudag á heimavølli ímóti B36.
-
EB/Streymur – HB 1-4 (0-2)
0-1: Daniel Johansen br 45.+3.
0-2: Adrian Justinussen 45.+6.
0-3: Pætur J. Petersen 56.
1-3: Elias El Moustage 67.
1-4: Pætur J. Petersen 75.
Dómari: Kári J. á Høvdanum