Flestu partrolarapør eru til fiskiskap. Skipini fiska upsa, og tey fáa eisini nakað av hjáveiði. Partrolararnir koma inn at landa, sum næsta vika gongur.
Í dag siga tey á Fiskamarknaði Føroya, at fiskiskapurin hjá partrolarum er hampiligur. Annars hevur leingi ljóðað, at fiskiskapurin eftir upsa hevur verið vánaligur.
Spurningurin er so, um hampiligi fiskiskapurin í løtuni hevur nakað við tað at gera, at nøkur trolfrí øki nú eru latin upp aftur fyri partrolarunum.
Treytin fyri at sleppa at fiska í trolfríu økjunum er, at skipini hava skiljirist í trolinum, eins skiljiristin nú er vorðin eitt krav í næstan øllum trolfiskiskapi eftir botnfiski undir Føroyum.
Á Fiskamarknaði Føroya vita tey í dag at siga, at ein djúpvatnstrolari er til fiskiskap. Sagt verður, at hesin fiskar kongafisk og kemur væntandi inn at landa miðskeiðis í vikuni.
Í løtuni eru sjey av teimum smáu trolbátunum til fiskiskap. Ein kemur inn at landa mánadagin, og hinir koma seinni í vikuni. Trolbátarnir fáa mest av toski og hýsu og so nakað av flatfiski.
Tvey garnaskip fiska svartkalva. Skipini koma inn at landa síðst í vikuni, men fiskiskapurin eftir svartkalva er smáligur. Tvey garnaskip fiska eisini havtasku og hava brúkiligan fiskiskap.
- Annað garnaskipið á havtaskuveiði landar mánadagin, og hitt kemur inn at landa miðskeiðis í hesi vikuni, verður lagt aftrat.
