Landsliðsmálverjin, Pauli Jacobsen og liðfelagarnir í HØJ spældu í dag dyst á útivølli móti Faaborg í næstbestu donsku hondbóltsdeildini.
Faaborg sum liggur aftast í deildini beit væl frá sær í dag, og tað kravdi eitt gott avrik hjá Paula, ið sambært Facebook-síðuni hjá HØJ var: "Man of the Match".
Tað eydnaðist HØJ at vinna dystin 29-24. Í steðginum var HØJ á odda 14-11.
HØJ hevur enn fullan pott. Teir hava 16 stig fyri átta dystir og eru fremst í deildini.
Í morgin klokkan 14 tekur liðið hjá Paula Mittún og Pæturi Mikkjalssyni, Team Sydhavsøerne móti liðnum hjá Kjartani Johansen, Lemvig-Thyborøn. Somu klokkutíð spælir FIF við fýra føroyskum leikarum dyst á útivølli móti Tønder. Klokkan 16 taka Teis Horn Rasmussen, Peter Krogh og liðfelagarnir í HC Aarhus móti Odder á heimavølli.
Støðan:
| Nr. | Lið | Dystir | Stig |
|---|---|---|---|
| 1 | HØJ | 8 | 16 |
| 2 | Skive | 8 | 14 |
| 3 | Aarhus HC | 7 | 10 |
| 4 | Lemvig-Thyborøn | 7 | 9 |
| 5 | HC Odense | 8 | 8 |
| 6 | Sydhavsøerne | 7 | 8 |
| 7 | Tønder | 7 | 7 |
| 8 | HC Midtjylland | 8 | 6 |
| 9 | Rækker Mølle | 8 | 6 |
| 10 | FIF | 7 | 6 |
| 11 | Norddjurs | 8 | 6 |
| 12 | Odder | 7 | 6 |
| 13 | Roskilde | 8 | 2 |
| 14 | Faaborg | 8 | 2 |
