Í kvøld veit tíðindastovan Reuters at siga, at 38 ára gamli journalisturin hjá teimum í Ukraina, Ryan Evans, læt lív í einum russiskum rakettálopi á ukrainska býin, Kramatorsk, í gjár.
Hann var eisini trygdarráðgevi hjá Reuters, og hann byrjaði í starvi hjá tíðindastovuni í 2022.
Ryan Evans, sum áður hevur verið bretskur hermaður, varð dripin, tá russiskar rakettir raktu hotellið í Kramatorsk, har hann búði.
Tveir aðrir journalistar hjá Reuters fingu eisini løstir í álopinum, harav annar fekk álvarsligar løstir, veit tíðindastovan at siga í kvøld.
- Vit arbeiða saman við myndugleikunum í Kramatorsk við at fáa upplýsingar um álopið. Vit stuðla okkara starvsfeløgum og familjum teirra, skrivar Reuters.
Kyiv Independent veit at siga, at tvær lokalar kvinnur fingu eisini løstir í russiska rakettálopinum í gjár.
Býurin, Kramatorsk, er áhaldandi álopin av russum, men tað hevur ongantíð eydnast russisku herdeildunum at taka býin.
##med2##