Í fleiri mánaðir hevur Danmark verið undir stórum trýsti frá amerikanska forsetanum, Donald Trump, um at geva Grønland frá sær.
Í eini nýggjari fráboðan tykist amerikanski uttanríkisráðharrin, Marco Rubio, tó at linka spentu viðurskiftini millum USA og Danmark.
- Amerikanski uttanríkisráðharrin, Rubio, staðfesti aftur sterka sambandið millum USA og danska kongaríkið, sambært Reuters, í eini fráboðan frá amerikanska uttanríkisráðharranum.
Útsøgnin kemur eftir, at Rubio hósdagin hitti danska uttanríkisráðharran, Lars Løkke Rasmussen. Hetta hendi í sambandi við ein fund hjá NATO uttanríkisráðharrum í Brússel.
Áðrenn fundin við Rubio upplýsti Løkke, at hann vildi taka fleiri mál upp viðvíkjandi sambandinum við USA.
- Eg haldi, at tað eru nógv ting, sum ein kanska hevur hug at kjakast um á hesum fundinum, sum snúgva seg um okkara viðurskifti við USA og hugsanina hjá nýggju stjórnini, segði Lars Løkke Rasmussen undan fundinum við Rubio.
Her nevnir hann millum annað vaksandi handilskríggið og ynskið hjá USA um útbygging.
Lars Løkke Rasmussen segði seg vera ørkymlaðan av "framhaldandi artikulering av onkrari amerikanskari ambitión um at víðka um amerikanskt øki".
- Men eg haldi eisini, at tað er týdningarmikið, at vit royna at halda okkum eitt sindur fokuserað á hendan fundin í dag. - Tað er ein NATO-fundur, sum vit eru á, segði Løkke.
Umframt uppgávubýtið millum NATO-limirnar, fara uttanríkisráðharrarnir at umrøða hernaðarmál og trygdarpolitisku støðuna.
Aðalskrivarin í NATO, Mark Rutte, varð á tíðindafundi undan NATO-fundinum spurdur, hví Grønland ikki er eitt punkt á skránni í dag.
- Tað hevði undrað meg, um Arktis ikki varð tikið upp sum evni á fundinum millum tey sameindu í dag. Tað er ein trupulleiki, og tað er ikki bara Danmark, tað eru eisini Ísland, Kanada, USA, Noreg, Finnland og Svøríki, sum eru hótt í Arktis, segði Mark Rutte.
Sambært honum eru tað serliga Kina og Russland, sum eru ein vandi fyri NATO í arktiska økinum.
- Vit vita, at Kina skapar sjóleiðir. Vit vita, at russar brynja seg í økinum.
Mark Rutte vísir á, at arktisku sameindu í NATO mugu styrkja samstarvið.
- Tey sjey arktisku londini arbeiða meira og meira saman fyri at tryggja, at vit halda tann partin av heiminum tryggan, sigur Rutte.
/ritzau/
