Í dag vita útlendskir miðlar at siga, at russar enn einaferð hava lopið á ukrainska havnarbýin, Odessa, við rakettum.
Ukrainski herurin sigur, at bæði undirstøðukervi og umsitingarbygningar við havnarlagið eru rakt í álopinum.
Sambært ukrainum brúkti Russland X-31 rakettir í álopinum á býin.
Russland hevur hert álopini á ukrainska undirstøðukervið og ukrainsku havnirnar við Donau og Svartahavið.
Tað er serliga síðan, at Russland tók seg burtur úr sonevndu kornavtaluni, at lopið hevur verið á havnarbýirnar.
Kornavtalan hevði við sær, at Ukraina trygt kundi útflyta korn úr nøkrum ukrainskum havnum og úteftir Svartahavinum.
Tað er tíðindastovan NTB, sum ber hesi tíðindi seinnapartin í dag.