Ukraina og Russland ákærdu í dag hvønn annan fyri at bróta vápnahvíld í sambandi við ortodoksar páskir.
Tað upplýsir tíðindastovan AFP.
– Frá klokkan 07:00 12. apríl høvdu vit skrásett 2.299 brot á vápnahvíldina. Meira nágreiniliga: 28 fíggindaálop, 479 skótingar, 747 dronuálop og 1.045 álop við FVP dronum, skrivar ukrainski aðalstabin í einum uppslagi á Facebook.
Ein FVP-drona verður fjarstýrd av flogskiparum fjart frá og flýgur við spreingievnum inn í fíggindamál.
Russiska verjumálaráðið ákærir Ukraina fyri næstan 2.000 brot á vápnahvíldina.
– Tilsamans 1.971 vápnahvíldarbrot hjá eindum hjá ukrainsku hermonnunum vórðu skrásett millum kl 16 og klokkan 8 lokala tíð, upplýsir ráðið, sambært russisku tíðindastovuni Tass.
Russiska ráðið sigur, at Ukraina skeyt 258 ferðir við artillerí ella stríðsvognum, framdi 1.329 álop við FVP-dronum og slepti "ymiskum sløgum av hernaðarútgerð" 375 ferðir.
Russland hevur eisini ákært Ukraina fyri at hava framt "trý náttarálop" móti russiskum støðum og "fýra royndir at koma fram" á hermótið. Tær royndirnar vórðu eftir øllum at døma forðaðar.
Vápnahvíldin er sett at vara í 32 tímar - frá kl 15 leygardag okkara tíð til klokkan 23 í kvøld.
Ein líknandi vápnahvíld varð gjørd í fjør. Síðani ákærdu báðir partarnir eisini hvønn annan fyri at bróta tað.
Fleiri samráðingar hava verið seinastu mánaðirnar við USA sum millummanni millum Russland og Ukraina. Tær hava tó ikki fingið partarnar nærri at enda stríðið, sum byrjaði, tá Russland herjaði á Ukraina í februar 2022.
Tilgongdin hevur verið drigin enn meira út, síðani kríggið í Miðeystri brast á og amerikanska fokusið hevur verið vendið móti Iran.
/Ritzau/
