Eitt talsfólk fyri Kreml sigur, at Russland eigur ongan lut í dronunum, sum mánakvøldið vórðu sæddar yvir Kastrup Lufthavn.
Hetta veit norska kringvarpið - NRK - at siga fyrrapartin, men í greinastubbanum verður eingin navngivin russisk kelda uppgivin.
Keldan er sambært AFP-tíðindastovuni, Kreml-talsmaðurin, Dmitrij Peskov.
Flogvøllurin í Kastrup var stongdur í fleiri tímar, eftir at dronur vórðu sæddar í loftrúminum nærindis flogvøllinum.
Fyribils er ógreitt, hvør stóð aftanfyri hendingarnar, sum danska løgreglan kallar eitt álop á danska undirstøðukervið.
Tað er fundur í verjusamgonguni, Nato í dag, men fundurin hevur sum skilst einki beinleiðis samband við hendingarnar í Kastrup í gjár.
Reuters veit at siga, at Nato á fundinum ávarar Russland um, at verjusamgongan fer at taka øll neyðug stig til tess at verja síni limalond.
Á Nato-fundinum verða hendingarnar viðgjørdar, har russisk jagaraflogfør herfyri gjørdu seg inn á loftrúmið hjá Estlandi.
Herfyri vóru eisini fleiri dronur skotnar niður í pólskum loftrúmi, og tað er enn einaferð Russland, sum hildið verður at standa aftanfyri.
Á Nato-fundinum í dag krevur verjusamgongan sambært Reuters, at Russland gevst við áganginum móti sínum limalondum.
Lesið eisini -
Zelenskyj: - Hatta er Russland - https://www.in.fo/news-detail/zelenskyj-hatta-er-russland
