Søkja aftur eftir aðalstjóra til Poul Michelsen

Løgmansskrivstovan søkir nú av nýggjum eftir aðalstjóra at stjórna Uttanríkis- og vinnumálaráðnum

Mikið rok var um hetta fyrr í summar, tá Poul Michelsen, landsstýrismaður, ikki vildi, at John Rajani, sum varð innstillaður sum nummar eitt, skuldi setast í starvið, tí hann metti ikki gegni at vera í lagi.

Í lýsingini sigur Løgmansskrivstovan millum annað:

– Vit sóknast eftir einum dugnaligum, ágrýtnum og framskygdum aðalstjóra at standa á odda fyri Uttanríkis- og vinnumálaráðnum. Aðalstjórin er næsti ráðgevi hjá landsstýrismanninum og hevur ábyrgdina av dagligu leiðsluni, menningini og rakstrinum av Uttanríkis- og vinnumálaráðnum. Aðalstjórin er ovasti leiðari fyri ráðið.

Høvuðsuppgávurnar hjá aðalstjóranum eru at:

· Leiða og samskipa arbeiðið í stjórnarráðnum,

· samskipa og fyrireika uppgávur á málsøkjum hjá stjórnarráðnum, nevnd niðanfyri, · fyrireika lógir, kunngerðir og reglugerðir innan virkisøkið,

· hava eftirlit við stovnum undir stjórnarráðnum, og tryggja, at aðrar viðkomandi uppgávur, sum hoyra virkisøkinum til, verða framdar

Um førleikakrøv verður kravt, at umsøkjarin hevur:

·  útbúgving frá hægri lærustovni á hædd við kandidatprógv,

·  leiðsluroyndir frá tí almenna og/ella privata arbeiðsmarknaðinum, og vitan um almenna fyrisiting.

·  fyrimunur er, um umsøkjarin hevur vitan og royndir á uttanríkisøkinum og/ella vinnumálaøkinum.

Umráðandi er, at tann, ið verður settur:

· hevur góð leiðslu- og samstarvsevni umframt mennandi leiðslustíl,

·  hevur gott strategiskt skil og er slóðbrótari í verkseting av strategiskum arbeiði,

·  dugir at seta greið mál og skapa úrslit,

·  hevur góðar samskiftisførleikar, bæði munnliga og skrivliga,

·  hevur góðar málførleikar, og

·  megnar til tíðir at arbeiða undir stórum trýsti.

Tann, ið verður settur, skal hava gott innlit í politisk viðurskifti og vitan um tær treytir, ið eru galdandi í einari politiskari fyrisiting.

Týdningarmikið er, at viðkomandi hevur vilja og hegni at ganga nýggjar leiðir.

Starvið er tænastumannastarv. Starvsheitið er aðalstjóri, og er starvið flokkað í 39. lønarflokki. Tað merkir, at aðalstjórin fær 54.339,50 krónur um mánaðin. Harumframt er ein mánaðarlig viðbót upp á kr. 5.094,67. Tilsamans  59.434,17 krónur. Viðbótin er ikki eftirlønargevandi. Tey fyrstu 2 árini eru at rokna sum royndarár.

Møguleiki er eisini fyri, at starvið verður sett tíðaravmarkað sambært § 2 nr. 3 í tænastumannalógini. Um so verður, fær viðkomandi eina ávísa avtalaða eyka lønarviðbót. Tann viðbótin er ofta 20 prosent, sum so er 10.867,9 omaná ella tilsamans 70.302,07 krónur.

Setanarøkið fevnir um Uttanríkis- og vinnumálaráðið, stovnar undir tí, Løgmansskrivstovuna og hini stjórnarráðini. Tænastustaðurin er í løtuni Uttanríkis- og vinnumálaráðið.