- Hey tit! Dreingjaklæðir, gentuklæðir, ítróttarklæðir ella bara klæðir sum heild!
Soleiðis ljóðaði eitt uppslag hjá formanninum í B68, Ian D. Jacobsen, á fjepparasíðuni hjá B68 hin 9. november.
- Í morgin fer Samba heim til Gambia at ferðast. Samba kemur úr sera trongum korum í Banjul í Gambia. Hann spurdi, um vit høvdu nøkur "gloymd klæði" í B68-húsinum, sum hann kundi taka við til heimlandið at deila út í nærumhvørvinum hjá sær.
Í uppslagnum á fjepparasíðuni vísir formaðurin í B68 á, at tíverri eru ikki so nógv gloymd klæðir í B68-húsinum í løtuni.
- Tí hava vit bjóðað okkum at hava eina lítla innsavning av klæðum. Um tit hava onkur klæðir, sum Samba kundi fingið við til Gambia, eru tit vælkomin at levera tey í B68-húsinum í kvøld klokkan 21.
Formaðurin í B68 vísir í sama viðfangi á, at talan kann vera um klæði í øllum støddum - til kvinnur, menn, dreingir og gentur, og best er, um klæðini eru tunn, tí hitin í Gambia liggur millum 24 og 32 stig.
Ian D. Jacobsen sigur, at eini 40-50 fólk komu við klæðum til Samba hetta kvøldið, áðrenn hann fór avstað.
- Við sær hevði hann einar 150 B68-blusur, umframt gaggur og fittar barnaskógvar til bæði gentur og dreingir.
Formaðurin í B68 sigur, at Samba fekk upp í fleiri kuffert av klæðum og skógvum.
- So, hann tók eitt ógvuliga stórt kuffert við sær, tá hann fór, og síðan fara vit at senda restina av klæðunum til adressuna hjá familjuni hjá honum í Gambia, sigur Ian D. Jacobsen.
##med2##
