Í gjár boðaði borgarstjórin í Havn, Elsa Berg, frá, at býráðið ætlaði at hækka stuðulin til LGTB+ úr 50.000 krónum upp í 100.000 krónur.
Í dag boðaði so Birgir Nielsen, býráðslimur fyri Fólkaflokkin, frá, at Fólkaflokkurin ikki tekur undir við at játta stuðul til LGBT+.
– Vit tvífalda stuðulin til Faroe Pride, tí høvuðsstaðar kommunan skal vera rúmlig, fjølbroytt og litrík. Stuðulin fer frá 50.000 kr. til 100.000 kr. og trý ára avtala er gjørd, skrivar Elsa Berg, borgarstjóri, á Facebook í kvøld.
Í gerðabókini hjá Tórshavnar kommunu sæst, at ein meiriluti, Elsa Berg, Heðin Mortensen, Heidi Lava Elgeirsdóttir, Anja Weyhe, Kristianna Winther Poulsen, Bergur Robert Dam Jensen, Hildur Eyðunsdóttir og Guttormur í Skála, Tróndur Sigurðsson og Kári Johansen atkvøddu fyri at hækka stuðulin til LGBT+.
Ímóti atkvøddu ein minniluti, Birgir Nielsen og Astrið Breckmann úr Fólkaflokkinum og Annfinn Brekkstein úr Sambandsflokkinum.
