Tordur Niclasen spurdi løgmann herfyri, hvørjar ætlanir landsstýrið hevði til tess at tryggja møguleikanum fyri nøktandi ferðafólka- og farmaflutningi millum Føroyar og Skotland, og nú hevur løgmaður svarað tingmanni Miðfloksins.
Í svarinum sigur løgmaður, at landsstýrið hevur sett sær fyri, at millumlandaflutningssambandið skal vera á privatum hondum. Ætlan landsstýrisins er, at møguleikarnir fyri ferðafólka- og farmaflutningi verða øktir munandi. Landsstýrið hevur tí sett 2 mió. kr. av á fíggjarlógini til tess at stuðla ítøkiliga ætlan hjá Atlantsflogi um flúgving til Skotlands til tess at økja um og menna møguleikarnar hjá flutningsvinnuni.
Atlantsflog
? Viðvíkjandi farmaflutninginum til Skotlands, so hevur Skipafelagið Føroyar ikki steðgað hesi rutu. Skipafelagið Føroyar hevur regluliga farmasigling til Skotlands einaferð um vikuna.
? Atlantsflog hevur ætlanir um at fara í holt við fasta flogleið millum Vágarnar?Glasgow?Aberdeen aftur til Vágar tvær ferðir um vikuna í tveir mánaðir í summar. Hetta er ein roynd hjá Atlantsflogi at víðka um virksemi. Fær henda flúgving góða undirtøku, so verður henda leið helst tikin uppaftur næstu sumrini og møguliga longd, sigur løgmaður í svarinum.
Víðari sigur løgmaður, at landsstýrið metir sambandið við Skotland sera týdningarmikið. Játtanin uppá 2 mió. kr. á fíggjarlógini í ár kann verða nýtt til at hækka partapeningin í Atlantsflog ella at veita stuðul ella trygd, fyrst og fremst í samband við eina møguliga leinging av flúgvingini út um teir tveir mánaðirnar.
Smyril Line
? Haraftrat hevur Smyril Line skipað farleiðirnar hjá Norrønu í summar soleiðis, at siglt verður til Lerwick í Hetlandi á leiðini millum Hanstholm og Tórshavn.
? Alt hetta ber í sær, at sambandið við Skotland verður á fleiri hondum enn tað var, tá tað almenna hevði meginpartin av flutninginum um hendi, bæði viðvíkjandi ferðafólki og farmi. Samstundis eru útreiðslurnar hjá tí almenna í hesum sambandi minkaðar munandi, og tað er at fegnast um, at vit á sumri hava nógv fleiri ferðamøguleikar og flutningsmøguleikar enn vit høvdu við almenna ferðaflutninginum, sigur løgmaður at enda í svarinum til Tord Niclasen.
