Eirikur Lindenskov
Tað vísir nýggjasta veljarakanningin, sum Gallup gjørdi fyri Sosialin fyrrakvøldið. Sambært kanningini fær Fólkaflokkurin 23 prosent, sum er ein framgongd upp á 2,9 prosent í mun til valið í 2008.
Sambandsflokkurin fær 24,6 prosent, sum er ein framgongd upp á 3,6 prosent í mun til seinasta løgtingsval. Flokkurin fær ein tingsess afturat, og fær átta tingsessir.
Javnaðarflokkurin stendur í stað. Hann fær 19,2 prosent í mun til 19,3 prosent seinast. Flokkurin varðveitir sínar seks tingmenn.
Sjálvstýrisflokkurin fær 3,5 prosent, sum er ein afturgongd upp á 3,7 prosent – flokkurin missir størra helmingin av atkvøðunum. Flokkurin missir annan tingsessin.
Tjóðveldi hevur størstu afturgongdina. Hann fær 18,4 prosent, sum er ein afturgongd upp á 4,9 prosent. Flokkurin missir tveir tingsessir og fær seks.
Miðflokkurin gongur eisini aftur. Hann fær 6,2 prosent, sum er ein afturgongd upp á 2,2 prosent. Flokkurin missir ein tingsess og fær tveir.
Framsókn fær 5 prosent av atkvøðunum og tveir løgtingssessir.
Um vit hyggja eftir teimum veljarakanningum, sum eru gjørdar seinastu tvey árini, so hevur tað svingað nógv hjá Sambandsflokkinum. Við ársbyrjan í 2010 lá hann um 30 prosent. Hann var eitt skiftið niðri á 26 prosentum, men hevur so aftur verið oman fyri 31 prosent í januar í ár. Á fólkatingsvalinum var hann eisini oman fyri 30 prosent, men síðani hevur gingið afturá, so at hann nú er komin niður á 24,6 prosent, sum kortini er ein pen framgongd í mun til seinasta løgtingsval. Hetta vísir kortini, at flokkurin hevur mist stóran part av tí undirtøku, sum hann sambært veljarakanningum hevur havt síðani seinasta val.
Fólkaflokkurin sær tú til at hava gjørt ein góðan endaspurt, tí sambært kanningini endar hann sum næst størsti flokkur við 23 prosentum, og harvið leggur hann sjógv millum seg og Javnaðarflokkin og Tjóðveldi. Fólkaflokkurin hevur verið niðri á 16 prosentum fyri fáum mánaðum síðani, men serliga seinastu vikurnar hevur hann tikið seg nógv fram – og bara síðani fólkatingsvalið hevur hann vunnið fýra prosent.
Tað kann verða stríðið um formanssessin, sum hevur gjørt mun, og kanska taktikkurin hjá Óla Breckmann við at skjóta upp Anniku Olsen til forkvinnu fyri at vinna atkvøður í høvuðsstaðnum hevur givið bonus.
Hóast Javnaðarflokkurin stendur í stað, so hevur flokkurin havt sera stóra framgongd í veljarakanningini – sum í januarmánaði gav flokkinum niðan fyri 13 prosent. Eftir formansskiftið hevur flokkurin vunnið undirtøku í veljarakanningum, og hann sær út til at hava vunnið alt tað mista aftur.
Sjálvstýrisflokkurin hevur svingað í veljarakanningum. Hann hevur verið uppi á 6-7 prosetnum, sum líkist tí, sum hann hevði á valinum seinast. Men serliga seinastu vikurnar er hann rættiliga dalaður í kanningunum, sum nú bara gevur honum eina slaka helvt av tí, sum hann fekk á seinasta vali.
Tjóðveldisflokkurin hevur havt penar veljarakanningar, sum hava givið honum væl meira, enn flokkurin fekk á seinasta vali. Hann hevur verið uppi á 27 prosentum, men er rættiliga dalaður, serliga síðani innanhýsisstríðið, sum førdi til at Sjúrður Skaale fór úr flokkinum fyrr í ár. So slaka undirtøku hevur Tjóðveldisflokkurin ikki havt, síðani Høgni Hoydal lyfti flokkin upp til størsta flokk í 1998.
Framsókn sær út til at hava fingið fótin fyri seg. Tað sær ikki út til, at flokkurin tekur frá Fólkaflokkinum – men kanska frá Tjóðveldisflokkinum.
