Hetta er 10. árið Smyril Line skipar fyri harmonikutúri við Norrönu, og seinasti túrurin við hesi Norrönu byrjaði í gjár. Seinasti túrurin varð sostatt eisini ein jubileumstúrur.
? Norröna fór avstað við 730 fólkum, og harav vóru 470 av teimum við fyri at sleppa á Harmonikutúr, sigur Áki Jespersen, ferðafólkaleiðari á Smyril Line.
Sum tað liggur í orðinum, so er nógvur harmonikutónleikur á skránni. Við á túrinum eru eini 40 harmonikuspælarar, sum spæla frá morgni til myrkurs runt um á skipinum. Spælt verður í cocktailbarrini, í náttklubbanum, í matstovuni og aðrastaðni.
Í gjárkvøldið, mánakvøldið, var eitt stórt syngið við tiltak í kafeteria, og á midnátt í kvøld er ætlanin at harmonikuspælararnir fáa eitt diplom, sum sigur, at teir hava verið við, umframt gávur og annað gott.
? Áhugin fyri harmonikutúrinum vísir seg at vera ógvuliga stórur, sigur Áki Jespersen.
? Tey bestu kømurini fara beinanvegin, og hesuferð høvdu vit bara couchettir eftir at bjóða fólki. Í ár byrjaðu vit við at lýsa tann 4. apríl, og vit plaga at seta eitt ávíst dato á nær tað ber til hjá fólki at bíleggja ferðaseðlar. Hetta verður gjørt fyri, at tað ikki skal bera til at leggja seg á ferðaseðlarnar eitt ár frammanundan.
Áki Jespersen vísir á, at tað eru tey somu fólkini, sum venda aftur á harmonikutúrarnar. Hetta er jú eitt upplagt høvi at hitta gamlar vinir, og eisini er ein slíkur túrur ógvuliga hugnaligur.
Ein harmonikutúrur við Norrönu kostar annars millum 750 og 1195 krónur.
