Serbia gjørdist fyri løtu síðani tað fyrsta landið at tryggja sær pláss í hálvfinaluni í EM-hondbóltskappingini. Tað hendi, tá serbar vunnu 24-21 á svium í Belgrad Arena í Beograd. Úrslitið gevur serbum eitt pláss í hálvfinaluni, samstundis sum sviar mistu tann seinasta møguleikan at sleppa sama veg.
Teir gulu og bláu sviarnir byrjaðu annars best, men vertirnir lótu seg ikki taka av fótum, og í steðginum vóru serbar á odda 14-11. Tað eydnaðist svium at minka munin, so tað onkuntíð var bara tað eina málið millum liðini, men so mistu teir takið aftur, og serbar fóru frá teimum aftur.
Í veruleikanum var eingin ivi um, at Serbia var tað betra liðið, og so hevði málverjin, Darko Stanic, aftur í kvøld ein góðan dyst.
Støðan í bólki 1 í millumumfarinum, nú øll liðini hava spælt tveir dystir, er hendan:
Serbía 7 stig
Týskland 5 stig
Danmark 4 stig
Pólland 3 stig
Makedonía 3 stig
Svøríki 2 stig
