– Visjónin hjá mær er bjóða fram eitt hús, sum skal vera opið fyri øll.
Tað sigur Sissal Kampmann, spurd hvørja hugsan hon hevur, og um broytingar verða, nú hon tekur við sum stjóri í Føroyahúsinum á Vesterbrogade 17 í Keypmannahavn eftir Hans Petur í Brekkunum, sum hevur verið stjóri seianstu 12 árini.
22 umsóknir vóru til starvið um at gerast leiðari í Føroyahúsinum, og sambært Martini Karbech Mouritsen, formanni í stýrinum fyri Føroyahúsið, so vóru umsóknirnar frá bæði føroyingum og dønum.
– Sissal Kampmann tekur við starvinum 1. august 2019. Fyrstu tveir mánaðirnar av starvstíðini fer hon at arbeiða saman við fráfarandi leiðara, Hans Petur í Brekkunum, sum hevur røkt starvið í 12 ár, sigur starvsnevndin fyri Føroyahúsið í fráboðanini.
Sissal Kampmann er útbúgvin cand.mag. í Norðurlendskum Bókmentum og máli av lærda háskúlanum í Keypmannahavn.
Hon hevur verið virkin á føroyska mentanarpallinum í mong ár. Vit kenna Sissal Kampmann frá m.a. mentanarsendingum í Kringvarp Føroya, eisini hevur hon rikið eina mentanar- og tónleikøacafé í Vestmanna, og júst hetta vikuskiftið fyriskipar hon skránna í fjósinum á G! Festivalinum.
– Vit eru sera fegin um at hava sett Sissal Kampmann í starv sum leiðari í Føroyahúsinum. Hon hevur neyðugu førleikarnar, sum Føroyahúsið hevur brúk fyri, sigur Martin Karbech Mouritsen, formaður í starvsnevndini fyri Føroyahúsið.
Við Miðlahúsið sigur Sissal Kampmann, at hon fer at leggja sera stóran dent á, at Føroyahúsið ikki verður eitt afturlatið hús.
– Sjálvandi er hetta eitt føroyahús, men tað er av alstórum týdnining, at hetta verður eitt víðopið hús fyri øllum, sum vilja hoyra meira um føroyska mentan og eisini fyri teimum, sum vilja fara í samstarv og samspæl við føroysku mentanina, um tað so er tann danska mentanin ella tann grønlendska, íslendska ella onkur heilt onnur mentan, so haldi eg, at tað er av týdning, at vit lata hurðar upp, og at vit fara í samspæl.
Sissal Kampmann vísir á, at Hans Petur í Brekkunum hevur arbeitt í 12 ár í einum húsi, sum trongdi álvarsliga til ábøtur, og tað vita øll, sum hava vitjað húsið, sigur hon.
– Men nú stendur húsið spildurnýtt við nýggjum køki, nýggjum gólvum, nýggjari ljósseting, nýggjum anleggi – og ja, har er alt nýtt. Hann hevur gjørt eitt megnar arbeiði, og nú er lagamanni at taka við eftir hann, sigur Sissal Kampmann.
Tað hava verið avbjóðingar við hølisviðurskiftini í mun til ljós til framsýningar og framførslur, omentað er alt 100 prosent í ordan nú, so nú er líka til at fara í gongd við alt møguligt spennandi, sigur Sissal Kampmann.
