Jákup Egholm Hansen
Tekniskur stjóri hjá Tórshavnar Kommunu
Skaðiligar ákærur
Í Degi og Viku fríggjadagin í seinastu viku var tekniski stjórin hjá Tórshavnar kommunu og onnur í familju hansara meira ella minni beinleiðis løgd undir korruptión av Sjónvarpinum. Hetta førdi til, at borgarstjórin bað um eina óhefta advokatkanning av málinum, fyri m. a. at staðfesta um nakað óregluligt var farið fram.
Tekniski stjórin reinsaður
Advokatkanningin hevur nú staðfest, at hvørki tekniski stjórin, restin av teknisku umsitingini ella borgarstjórin hava framt nakað brot á §3 í fyrisitingarlógini.
Sjónvarpið verður nú kært
Grovu skuldsetingarnar hjá Sjónvarpinum móti tekniska stjóranum í Tórshavnar kommunu, og mistonkiliggeringin av øðrum í familju hansara, reisa spurningin um Sjónvarpið er farið útum mark, og hevur brotið góðan fjølmiðlasið. Vit hava tíbetur fingið eina fjølmiðlaábyrgdarlóg nú, soleiðis at vanlig fólk hava fingið eitt amboð at verja seg móti slíkum ágangið sum hesum frá Sjónvarpinum. Og hetta málið er so álvarssamt, at tað einasta rætta er at royna málið í Fjølmiðlanevndini, sigur Jákup Egholm Hansen. Og nú óhefta advokatkanningin er komin til eina greiða niðurstøðu, hevur tekniski stjórin hjá Tórshavnar kommunu avgjørt at kæra málið. Í fyrstu atløgu verður kært til Kringsvarpsleiðsluna. Um ikki ein fult út nøktandi umbering og rættleiðing verður givin í seinasta lagið komandi mánadag, verður farið til Fjølmiðlanevndina, sigur Jákup Egholm Hansen.
Skeivur og misvísandi tíðindaflutningur
“Sjónvarpið hevur hóast betri vitan, borið fram tíðindi, ið eru full av feilum, sum eru snaraði og sum innihalda beinleiðis lygnir. Teir hava skatt umdømi hjá mær og familju míni. Væntandi farið eg eisini at stevna Sjónvarpinum eftir endurgjaldi fyri skaða á mítt umdømi og fyri at hava skatt framtíðar virkismøguleikar hjá bæði mær og familju míni”
Sjónvarpið ikki hildið góðan fjølmiðlasið
Lógin um fjølmiðlaábyrgd áleggur fjølmiðlum at vísa góðan fjølmiðlasið. Góður fjølmiðlasiður er m.a., at tá talan er um serliga skaðandi upplýsingar, áliggur fjølmiðlunum ein serlig skylda at kanna øll viðurskifti til botns frammanundan. Harumframt er tað ikki góður fjølmiðlasiður at hongja óviðkomandi persónar við navni út. Og sjálvandi er tað eisini umráðandi, at fjølmiðlarnir tosa satt, og lýsa allar vinklar í málinum. Sjónvarp Føroya hevur ikki hildið seg til nakra av hesum meginreglum.
Tað vísir seg nevnliga, at teir hava ikki tosa við fleiri av nevndu persónunum í innslagnum í Degi og Viku. Eisini hevur Sjónvarpið borið fram skeivar upplýsingar um konu tekniska stjórans, og hevur nevnt navnið á konu hansara við navni í hesum sambandi, hóast at tíðindavirðið í hennara navnið er óviðkomandi. At hon er eitt kent navn er ongin umbering fyri slíkari framferð hjá Sjónvarpinum.
Samstundis eru samrøður, ið tíðindakvinnan Annika Bolton Mortensen hevði við tekniska stjóran og leiðaran fyri Húsaumsitingina hjá kommununi tagdar burtur. Í hesum samrøðum váttaðu hesir, at tekniski stjórin beinanvegin tók avgerð um at hann var inhabilur, og tók seg burtur úr øllum sum hevði við samskifti við allar byggifyritøkurnar sum arbeiða í Realskúlanum at gera. Í staðin var í Degi og Viku sagt, at tekniski stjórin hevði ongar viðmerkingar. Eitt notat í málinum vísir, at hetta er ikki satt, og at tað vóru fleiri vitni til tað. Tekniski stjórin vildi bert ikki gera myndaupptøkur.
Sjónvarpið snarar fakta
Eisini kann staðfestast, at Sjónvarpið hevur snarað fakta í málinum. Víst varð til eitt tekniskt notat um bruna- og trygdarviðurskifti í Gamla Realskúlanum, sum tekniski stjórin hevði gjørt eftir áheitan frá borgarstjóranum, sum var sagt verða prógv um, at tekniski stjórin hevði ikki hildið seg vekk frá umvælingararbeiðinum. Notatið hevur tó onki við sjálvt arbeiði hjá byggifyritøkuni Viking Smíð at gera. At Sjónvarpið er fullkomiliga á skeivari leið verður prógvað á teirra egnu heimasíðu, har teir eftir sendingina í Degi og Viku skriva, at tekniski stjórin hevði fyrireikað alt málið og notatið áðrenn Viking Smíð fekk arbeiðið. Hetta er eisini lygn. Notatið er gjørt tríggjar mánaðir aftan á at skúlin varð stongdur, og umvælingararbeiði byrjaði.
Sjónvarpið totalt blottað fyri sjálvkritikk
Eftir at hava umrøtt málið við fólk við serkunnleika á fjølmiðlaøkinum, leggur tekniski stjórin hjá Tórshavnar kommunu ikki fingrarnar ímíllum í síni meting av trúvirðinum hjá Sjónvarpinum. “Sjónvarpið er kritiskt, men totalt blottað fyri sjálvkritikk. Hetta er sera óproffessionelt journalistiskt og redaktionelt arbeiði” sigur Jákup Egholm Hansen. “Málið er so álvarsligt fyri trúvirði hjá Sjónvarpinum, at leiðslan í Kringvarpinum neyvan gera annað enn at taka avleiðingarnar av hesum máli og seta eina kanning av handfaringini hjá Anniku Bolton Mortensen, Georg L. Petersen, redaktøri og Øssur Winthereig, tíðindaleiðara í Sjónvarpinum í gongd beinanvegin. Tíðin er búgvin til sjálvrannsakan í Sjónvarpinum, og tíðin er eisini komin til at Fjølmiðlanevndin leggur eina linju nú” sigur Jákup Egholm Hansen at enda.
