Nú veðrið er av tí allar besta, henda mikudagin í farnu viku, var Børge farin í holt við eina av dagsins uppgávum longu frá morgunstundini.
Ein av mongu grasblettunum í kirkjugarðinum skal sláast enn einaferð.
- Líkt er til, at grasið vekur væl í ár, hóast kuldan sum hevur verið, sigur Børge Lamhauge.
Hann hevur eisini ábyrgdina av kirkjugørðunum í Rituvík og í Oyndarfirði.
Lættari
At halda ein kirkjugarð umfatar ikki bert tað at sláa grasið. Sum gravari her á Glyvrum hevur Børge eisini aðrar uppgávur.
Ein onnur uppgáva er at gera gravirnar klárar í samband við jarðarferð.
Hvussu nógvar gravir ið verða grivnar um árið, er sjálvandi ójavnt. Men okkurt árið hava teir grivið 25 gravir íalt í teimum trimum kirkjugørðunum á Glyvrum, Oyndarfirði og Rituvík.
Fyrr tók tað sína tíð, tí tá varð tað gjørt við spaka og handamegi.
- Í dag hava vit eina gravimaskinu, so nú gongur tað nógv lættari, sigur Børge Lamhauge.
