Nú Klaksvíkin stendur á høvdinum í samband við fyrireikingar til ársins Summarfestival eru fyrireikingarnar til Føroya Sjómannadag, sum verður í Klaksvík 18. august, eisini í gongd.
Ein fastur táttur á Føroya Sjómannadegi er, at Grindamannafelagið vísir, hvussu hvalir verða skornir upp. Frásøgmaður greiður frá bæði á føroyskum og enskum, men tiltakið hevur ikki verið á hvørjum ári, tí tað hevur ikki altíð hepnast at fingið hendur á grindahvali.
Men seinast grind var í Klaksvík, var sýslumaðurin so beinasamur at lata ein hval til Føroya Sjómannadag, og Sjúrður Josephsen skipaði síðani fyri, at hvalurin varð lagdur í ein frystikonteynara hjá Faroe Ship í Norðhavnini.
Skráin til Føroya Sjómannadag verður kunngjørd í vikuni beint eftir Summarfestivalin.
Dragin samskipar aftur í ár framsýning av stóru træseglskipunum, og sum skilst verða øll skipini við aftur í ár, og kanska onkur fyri fyrstu ferð. Meira um hetta í næstu viku, siga fyrireikararnir.
