– Vit merkja eina framgongd samanborið við í fjør. Vit hava selt væl fleiri ognir higartil í ár, so vit kunnu ikki annað enn lata væl at, sigur Jón Simonsen, stjóri í Skyn.
Kreppan seinastu árini hevur, sum vera man, havt við sær færri sethúsahandlar. Í 2007 vórðu seldar tilsamans einar 300 - 350 sethúsaognir gjøgnum meklararnar. Hendan sølan lækkaði heilt niður í einar 110-120 sølur í 2009. Men í fjør sá betur út, tá einar 200 húsaognir vórðu seldar gjøgnum meklararnar. Jón Simonsen væntar sær nógv av hesum árinum, tí higartil sær betur út.
Tað at bankarnir nú eru meira sinnaðir at veita lán, og at fólk sum heild eru meira bjartskygd, hevur sjálvandi sína ávirkan.
Fólk, sum fylgja væl við húsasølum, vilja vera við, at bankarnar vóru sera trekir at veita sethúsalán í 2009, og at hetta hevði við sær ein fløskuháls, sum nú tykist loysna aftur. Hóast tíðirnar eru ringar, so eru tað altíð fólk, sum skulu seta búgv og keypa hús.
