Samband kann vera millum spreingingina í dag á amerikansku sendistovuni í Oslo og trygdarstøðuna í heiminum.
Tað sigur løgreglan í Oslo á tíðindafundi.
Løgreglan leggur tó dent á, at hetta bert er ein av fleiri hypotesum, sum tey arbeiða við, og at tey enn ikki hava sett seg á nakað.
Spurd, um málið er kannað sum yvirgangur, svarar løgreglan, at talan er um eina av hypotesunum.
– Tað er ein av hypotesunum, at talan er um yvirgang, men vit eru ikki heilt vís í tí. Vit mugu vera opin fyri møguleikanum, at tað kunnu vera aðrar orsøkir til tað, sum hendi, sigur Frode Larsen, sum stendur á odda fyri felags eindini hjá løgregluni fyri kanningar- og fregnartænastur, við NRK eftir tíðindafundin.
Í løtuni eru eingin illgruni, men løgreglan heldur, at talan er um ein ella fleiri gerningsmenn. Leitað verður nú eftir teimum við hundum, dronum og tyrlu.
Tjóðarhóttanarstøðið í Noregi er framvegis á sama støði eftir hendingina, men norska løgreglan hevur sett fleiri tiltøk í verk fyri at økja um trygdina kring amerikansku sendistovuna og í iranska og jødiska samfelagnum í Noregi eftir spreingingina.
Løgreglan økir eisini um sína "trygdarnærveru" í Oslo, stendur í fráboðanini.
Spreingingin hendi sunnunáttina og var sambært løgregluni rættað móti sendistovuni. Eingin fólkaskaði var av hendingini, men materiellur skaði var á inngongdini hjá sendistovuni, stendur í fráboðanini.
Løgreglan fekk fyrstu boðini um spreingingina umleið klokkan 1 í nátt.
Ein íbúgvi á staðnum sigur við blaðið VG, at "alt húsið ristist", tá íbúgvin hoyrdi eitt hart brak frá sendistovuni.
Fleiri íbúgvar siga, at eftir spreingingina setti eitt roykskýggj seg yvir økið.
Spreingingin á amerikansku sendistovuni í norska høvuðsstaðnum hendir í eini tíð, har USA saman við Ísrael hevur sett kríggj í gongd móti Iran.
Seinasta vikuskiftið byrjaðu londini bæði eitt hernaðarligt átak í Iran. Sambært amerikanska forsetanum, Donald Trump, varð hetta gjørt fyri at forða fyri, at Iran skuldi gerast eitt hernaðarligt kjarnorkuveldi.
Ovasti leiðarin í Iran, Ayatollah Ali Khamenei, var millum tey fyrstu, sum vórðu boðað deyð.
Iran hevur svarað aftur við at leypa á amerikanskar hernaðarstøðir í Miðeystri.
/Ritzau/
