Jón Brian Hvidtfeldt
Løn í 12 mánaðir. Tað er kravið frá Árna Gregersen, stjóra í D Media, sum er nýggja felagið, sum eftir ætlan hjá Árna Gregersen og Eyðfinn Reyðberg skuldi geva Dimmalætting útaftur, eftir at virksemið hjá Dimmalætting steðgaði 13. septeber í ár.
Sama dag stovnaðu teir nýtt felag, nevnt D Media, sum dóttirfelag hjá Dimmalætting.
Hetta nýggja felagið yvirtók alt innbúgvið, allar teldur og servarar og nøvnini Dimmalætting, Bering, biz.fo og Færø Amtstidendes Bogtrykkeri og domennavnið www.dimma.fo. Eftir í gamla felagnum var øll skuldin og øll lønarkrøvini hjá starvsfólkunum, sum sambært fyribilsuppgerð hjá fyribils bústjóranum er upp á 4.000.000 krónur. Í skiftirættinum í gjár kom fram, at krøvini verða væl hægri, tá endaliga uppgerðin verður liðug.
Einasti lønarsáttmáli, sum varð fluttur úr gamla felagnum, sum er farið á heysin, er sáttmálin hjá Árna Gregersen, stjóra og ábyrgdarblaðstjóra, upp á 70.000 krónur um mánaðin. Hann var eisini tann einasti, sum varð settur í starv í nýggja felagnum, D Media, har hann helt fram við sama sáttmála. Tá stjórin hevur eitt ára uppsagnartíð, so hevur hann sett krav fram um, at hann skal hava 840.000 krónur úr nýstovnaða felagnum, sum hann var stjóri fyri frá stovnan 13. september 2013 til seinni í mánaðinum, tá hann verður koyrdur frá aftur, og fyribils bústjórin, Sigmund Poulsen, advokatur, tekur yvir.
Sambært tí, sum bústjórin upplýsti í rættinum í gjár, so má nýggja felagið eisini krevjast konkurs av hesum stóra lønarkravi, sum fyrrverandi stjórin hevur sett. Felagið hevði 80.000 krónur í stovnandi partapeningini, sum stóð á bók. Men eftir at advokaturin, sum hjálpti gomlu eigarunum at stovna felagið, hevði fingið sítt, vóru nakrar og 40.000 krónur eftir. Bústjórin hevur brúkt meginpartin av teimum pengunum at flyta og hýsa útgerðina, sum stóð í leigaðu hølunum hjá Dimmalætting í Niels Finsensgøtu í Havn. Tí eru eingir pengar eftir, upplýsti Sigmund Poulsen í skiftirættinum.
Lesið meira um frágreiðingina, sum Sigmund Poulsen, advokatur, hevur skrivað um viðurskiftini í Dimmalætting-samtakinum, og sum varð løgd fram í Skiftirættinum í týsdagin, á síðu 8.
