Men nú fer eitt nýtt samstarv um verju at styrkja hernaðarligu førleikarnar hjá Norðurlondum og skunda undir dubbing.
Tað greiða danska forsætisráðfrúan, Mette Frederiksen, og norski forsætisráðharrin, Jonas Gahr Støre, frá í samrøðu við Ritzau.
- Hvør einstakur okkara er eitt lítið land. Vit kunnu gera nógv í teimum stóru samgongunum, men vit kunnu eisini gera nógv í Norðurlondum, um vit kunnu raðfesta okkara samstarv enn meira, og vit taka tey týðandi stigini har, sigur Mette Frederiksen.
Teir báðir sosialdemokratisku stjórnarleiðararnir hava brúkt nógva tíð saman seinastu dagarnar. Fyrst fóru tey saman til Ukraina, og nú eru tey savnað í norska høvuðsstaðnum Oslo til ráðstevnu við flokslimum um øll Norðurlond í felagsskapinum Samak.
Á fundinum umrøddu Mette Frederiksen og Jonas Gahr Støre millum annað tættari samstarv á verjuøkinum.
Ávísa sniðið og tiltøkini verða løgd fram seinni í vár, men stjórnarleiðararnir seta leiðina nú.
- Tað verður í roynd og veru skilt lutfalsliga breitt sum rakstrarførleikar, eftirlit og harvið verjupolitikkur í breiðari merking, sigur Mette Frederiksen.
Norski Jonas Gahr Støre greiðir frá, at Danmark og Norra í felag kunnu styrkja eftirlitið við økjunum, sum eru kring Norðurlond.
- Vit skulu samstarva á økjum, har vit hava landafrøðilig áhugamál, so sum Norðsjónum, innsiglingin til Eystrasalt og Arktis, har vit hava felags áhugamál, sigur hann.
Uppgávurnar í nýggja samstarvinum kunnu eisini fevna um felags venjing her, felags innkeyp og samstarv um at útvega sær røttu útgerðina.
Til dømis kunnu Noreg og Danmark eisini samstarva um viðlíkahald av F35-flogførunum, vísir Jonas Gahr Støre á.
Sjálv framleiðslan av verjuútgerð skal eisini økjast.
- Vit eru samd um, at vit mugu styrkja vinnuna her fyri at kunna framleiða tað, sum okkum tørvar, sigur Jonas Gahr Støre.
- Har fara vit at kanna, um serligir møguleikar eru fyri samstarvi millum norska og danska vinnu- og granskingarumhvørvið.
Mette Frederiksen væntar, at økta spenningsstøðið í Arktis bara fer at vaksa við tíðini. Her kunnu Danmark og Noreg í felag hava eftirlit við økinum.
- Og eg taki fegin undir við, at Noreg er ein góður verjuframleiðari, leggur hon afturat.
Fyri nøkrum døgum síðani gav forsætisráðharrin boðini "keyp, keyp, keyp" til donsku verjuna.
Sjálvt um viljin er har, so kann hann framvegis vísa seg at vera trupul at røkka, væntar hon.
Samstarvið við Noreg kann hjálpa til við hesum.
- Øll evropisk lond kunnu koma í somu støðu, at vit eru sinnað at brúka fleiri pengar, samstundis sum tað er trupult at fáa keypt. So tað kundi verið tættari rakstrarsamstarv á kapasitetssíðuni, sigur Mette Frederiksen.
/Ritzau/
