Tað var ein heldur løgin sjón, sum møtti fólki, ið spákaðu sær ein túr eftir sandinum á Sandi um vikuskiftið.
Her gongur fólk næstan hvønn dag, bæði í góðum og ringum veðri - um veturin eins væl og um summarið.
Yviri móti ósanum lá ein undarligur fiskur deyður uppi á sandinum - ein sonevndur mánafiskur.
At síggja til er fiskurin nýliga deyður og er skolaður upp á sandin, har fólk hava tikið myndir av fiskinum.
Á heimasíðuni - www.snar.fo - verður sagt um mánafisk, at hann er í øllum heimshøvum.
- Undir Føroyum er hann viðhvørt at síggja um summarið og heystið úti til havs. Fiskurin stendur á skák í sjónum, ofta við ryggfjøðurini stingandi uppúr.
Sagt verður, at mánafiskur er fingin nakrar ferðir inni við land í Føroyum.
##med2##
- Hann er í øllum teimum heitu og flógvu høvunum - í Indiahavinum, Kyrrahavinum og Miðjarðarhavinum.
Lagt verður aftrat, at í Atlantshavinum er mánafiskur frá Argentina og Suðurafrika og norður til Ný Foundlands, Noregs og Íslands.
Wikipedia veit at siga, at miðalvektin á mánafiski liggur um 1000 kilo, og miðallongdin er 1,8 metrar.
Men, fiskurin kann gerast heilt uppí 3,33 metrar langur, og tá vigar hann nøkur tons.
