Eyðun Klakstein
eydun@sosialurin.fo
Fyri góðari viku síðani varð skipað fyri stuðulskonsert á dansistaðnum Rex í Havn, og nú eru innkomni peningurin latin átakinum Í menniskjum góður tokki.
Stuðulskonsertin í Rex endaði sum gávukort upp á leikur frá Klávus fyri góðar 37.000 krónur. Hesi gávukort verða latin familjum við smærri børnum.
- Eftir at hevði lisið um, hvussu nógv søkja um hjálp frá Í menniskjum góður tokki, vildi eg gjarna gera okkurt fyri at hjálpa, og tað bleiv so til eina stuðulskonsert, sigur Rúni Djurhuus, sum rekur dansistaðið Rex.
Hann fekk eina langa røð av kendum tónleikarum at spæla til tiltakið. Terji Rasmussen, Fríði Bjørgvin, Petur og Guðrun Háberg, Signar í Homrum, Vígdis Fjallstein, MC Hár, Gipsy Train, Jens Marni, Divaz, Mike, Grandma's Basement og DJ Martin Kjærbo framførdu til stuðulstiltakið.
– Tónleikarar eiga stóra takk fyri, at teir tóku so væl undir við tiltakinum, og eg má eisini takka Expert, Klávus, Atlantsflogi og Henning Nicodemussen fyri góða hjálp, sigur Rúni Djurhuus.
Átakið Í menniskjum góður tokki er sera fegið um gávuna frá stuðulskonsertini.
- Vit samskipa eina hjálp til børn og barnafamiljur, men tað eru tey mongu fólkini, sum savna pengar inn til okkum, sum gera tað møguligt at veita hjálp, og tí eru vit sera takk fyri hesa hjálpina og alla aðra hjálp, sum vit fáa, sigur Laufey H. Blaasvær, skrivari í felagsskapinum.
Tey hava aftur í ár fingið hundraðtals umsóknir um jólahjálp, og hesar umsóknir skulu nú viðgerast.
Í fjør lat Í menniskjum góður tokki hjálp til 376 familjur – hesi umfata 1241 einstaklingar, av teimum 759 børn. Av teimum, sum fingu hjálp, vóru 72 prosent stakir uppihaldarar.
