Út av lagi vánaligar umstøður í Hoydølum

Anna Margretha Otthamar
Foreldur at næmingi í 2. HF

Alt eftir tímatalvuni hjá einstaka næminginum skulu næmingar møta nakað so­leiðis: 1 ella 2 blokkar á Vinnu­háskúlanum, síðani við einum intervalli á millum 15 minutt­ir og ½ tíma, einstakir blokk­ar á Studentaskúlanum, fyri síðani enn einaferð at skifta til fyrra skúlastaðið í summ­um førum. Stundum skulu næmingarnir flyta millum skúlarnar, tá teir annars áttu at havt matarsteðg. Tað er helst ikki neyðugt her at grundgeva fyri, at inn­lær­ingin hjá næmingum er munandi betur, um teir fáa okkurt til matna við jøvnum millumbilum. Men hetta verða ikki stundir til hjá hes­u­m næmingum í Hoy­døl­um hetta skúlaárið, hóast hetta er lógarásettur rættur.
Hesar umstøður kunnu lætt­liga taka hugin frá næm­ing­um yvirhøvur at ganga í skúla­num.
Meg lysti at vita hvør, ið klárar at pakka taskuna nið­ur, ganga til Bussleiðina hjá Tórshavnar Kommunu, ferð­ast við bussinum niðan “nær­hendis” Oyggjarvegnum (Buss­leið­in hevur sjálvsagt fast­lagda ferðaskrá, ið ikki er løgd av Studentaskúlanum í Hoy­døl­um), ganga síðsta strekk­ið og taka skúlatingini upp­aftur úr taskuni, alt uppá 15 minuttir í fleiri førum og EISINI koma til tíðina. Næm­ing­arnir hava fingið at vita, afturat oman fyri nevn­du keðiligu boðum, at møta teir ov seint verður hetta at rokna sum frávera. Heilt erligt. Og so eru tað bert lærararnir, sum fáa endur­rindað útreiðslurnar til hýru­vogn.
Ikki allir næmingar hava bil, og sum vit hava hoyrt nú gjøgnum fleiri ár eru park­er­ingsviðurskiftini við Studentaskúlan út av lagi vánalig, við tað, at alt ov fá parkeringspláss eru í mun til talið av næmingum og lærarum. Nakað av tíð man fara til at finna parker­ings­pláss hjá teimum næmingum, sum hava bil. Teir næmingar, sum skulu nýta buss ella ring­ja til onkran tey kenna, ið eigur bil, meti eg verða sleptar uppá fjall.
Hetta kunnu hvørki Menta­málaráðið, leiðsla skúl­ans ella býar­myndug­leik­ar vera bekent. Hví ikki gera okkurt radikalt betri? Seta telt til frálæru upp við Studenta­skúlan, útvega ókeyp­is skúlabuss, ið ger tað møguligt at møta á báð­um støðum rættstundis, ella lata allar næmingar á skúla­num noyðast at liva við hesum umstøðum í eitt ávíst tíðarskeið, við at allir flokk­ar skiftast um at hava tvey frálærustøð at ferðast ímill­um?
Teir næmingar, sum í løtu­ni skulu liva við hesum stak vána­ligu umstøðunum alt hetta skúlaárið, verða væl ikki revsaðir fyri eitthvørt, ella hvussu?
Eg fari hervið at heita á Mentamálaráðið, leiðslu skúlans og onnur við­kom­andi, um at taka málið upp aft­ur til viðgerðar. Onkur fræg­ari loysn enn hendan man kunna finnast um viljin er til staðar.