Veðrið er gott, og soleiðis verður eisini teir næstu dagarnar, sambært donsku veðurstovuni, DMI.
Í morgin verður stilt veður, undir 5 m/ sek., og soleiðis verður eisini sunnudagin, fyrst 2-5 m/ sek. og seinni 4-7 m/ sek.
Hitin bæði leygardagin og sunnudagin verður tó ikki øðrvísi enn í dag, leygardagin millum frostmarkið og 5 stig, og sunnudagin millum 2 og 6 stig.
Mánadagin frískar hann vindin nakað, upp í 5-10 m/ sek. og seinni upp í 8-13 m/ sek. Tá verður heldur lýggjari, millum 4 og 8 stig.
Men, hóast vit enn ikki kunnu snakka um nakran hita, tó at vit í næstu viku koma út í mai, kunnu vit kortini fegnast um góða veðrið.
Í góðveðrinum í dag hevur Sands kommuna lagt ørindi úr sangi hjá Sólvit Simonsen, sála, út á sína Facebook-síðu saman við viðheftu mynd.
Myndin er rættiliga vøkur, eins og ørindi úr sanginum hjá Sólvit Simonsen er tað eisini:
Tað er ein bygd, so vøkur man hon liggja.
Her tætt við vatn og fram við vakra vág.
Tú eftir henni altíð noyðist hyggja.
Ei vakrari tú her í verøld sá.
Tað Sandsbygd er, vit vita tað øll somul.
Hon bygdafólki okkar' stendur næst.
Vit elska hana, ung so væl sum gomul.
Ei betri bústaður á foldum fæst.
