Í morgin koma føroysku svimjararnir til hús aftur, eftir at teir um vikuskiftið hava luttikið í Reykjavik International Games 2016, sum punktum varð sett fyri seinnapartin ídag.
Heimasíðan hjá Svimjisambandinum, svimjing.com, veit í kvøld at siga, at í opna bólkinum settu føroysku svimjararnir níggju met, og haraftrat vórðu 14 føroysk juniormet sett.
Serliga merkisvert var tað, at Sára R. Nysted setti stevnumet í 200 metur blandað.
Í opna bólkinum vunnu føroysku svimjararnir seks gullmerki, níggju silvurmerki og sjey bronsumerki. Í yngra bólkinum vunnu føroysku svimjararnir trý gullmerki, fimm silvurmerki og fimm bronsumerki.
Umframt hetta vann Frans Johannesen, sum er føroyingur, men í hesi kappingini umboðaði Danmark, fýra gullmerki og eitt silvurmerki.
