Landsliðsleikarin, Tróndur Mikkelsen og liðfelagarnir í Kristiansand høvdu í dag torføran arbeiðssetning í bestu norsku hondbóltsdeildini.
Í Aquarama høllini í Kristiansand tóku Tróndur og liðfelagarnir móti toppliðnum, Kolstad.
Kristiansand mátti lúta 28-33 fyri Kolstad, ið var frammanfyri 15-12 í steðginum.
Tróndur skoraði fýra mál, og sambært heimasíðuni hjá norska hondbóltssambandinum var hann besti leikarin hjá Kristiansand í dystinum.
Kristiansand er fimtaftast í deildini við 15 stigum. Teir eru eitt stig omanfyri Fjellhammer, ið er á triðaftasta plássinum við 14 stigum.
Trið- og næstaftasta liðið mugu aftaná lokið grundspæl spæla upp- og niðurflytingardystir móti einum liði úr næstbestu deildini.
Komandi sunnudag spælir Kristiansand dyst á útivølli móti Bergen. Seinasti dysturin hjá Kristiansand í grundspælinum verður á heimavølli móti Arendal, sunnudagin 6. apríl.
