Handilsmaðurin Elon Musk segði tíðliga í morgun, at arbeitt verður við at steingja USAID, sum er amerikanska stovnurin fyri menningarhjálp.
Hann metir, at Trump-stjórnin kann skerja eina billión dollarar av hallinum á fíggjarlógini hjá amerikansku stjórnini næsta ár.
Tað segði hann í samrøðu á sosiala miðlinum X, sum Musk sjálvur eigur. Millum teirra, sum luttóku, vóru republikansku senatorarnir Joni Ernst og Mike Lee.
Musk er settur av Donald Trump at standa á odda fyri einum paneli, sum skal finna samveldiskostnaðarsparingar undir navninum Skrivstovan fyri effektivitet hjá stjórnini (Doge).
Sambært Musk heldur Trump eisini, at USAID skal leggjast niður.
Stuðulin frá USAID fer til útlendska hjálp. Tað er heimsins størsti einstaki gevari, og í 2023 rindaði USAID 72 milliardir dollarar.
Peningurin fer til dømis til kvinnuheilsu í ósemjuraktum økjum, arbeiði móti mutur og atgongd til reint vatn.
42 prosent av allari humaniterari hjálp í fjør varð veitt av USAID, stendur í frágreiðing hjá ST.
Sum dømi um hjálparveiting, sum eru í vanda fyri at verða burturbeindar, eru økissjúkrahús í tailendskum flóttafólkalegum, landminur í krígsøkjum og heilivágur at viðgera milliónir, sum líða av HIV og øðrum sjúkum.
Sum liður í "America first" politikkinum hjá Donald Trump hevur hann givið boð um "globala frysting" av tí mesta av amerikansku uttanríkishjálpini.
Sunnudagin boðaði Reuters frá, at Trump-stjórnin hevði koyrt tvey leiðandi trygdarfólk hjá USAID úr starvi.
Hetta hendi, eftir at teir báðir høvdu roynt at forða umboðum frá Doge í at koma inn á avmarkaðar partar av bygninginum.
Í prátinum um X segði hann eisini, at "professionell útlendsk svikanetverk" stjala stórar upphæddir við at lata sum um, at teir eru amerikanskir ríkisborgarar.
Musk greiddi ikki nærri frá, hvussu hann kom til ta niðurstøðu, at Trump-stjórnin kann røkka upp til eina billión dollarar í uppsparing.
Ritzau/Reuters
