Í Danmark er TV-2 meira enn ein sjónvarpsstøð. Áðrenn danir høvdu fingið sjónvarpsrásina, sum skuldi verða alternativ til DR, høvdu danir fingið ein poppbólk við navninum TV-2.
Steffen Brandt og hansara menn í bólkinum TV-2 funnu fótafestið í Aarhus, og seinastu 30 árini hava teir verið ein fastur partur av donskum tónleikalívi – bæði tá ið tað kemur til fløguútgávur, hitt og live-framførslur.
Fyrr í hesum mánaðinum hátíðarhildu teir 30 ára dagin fyri stovnanina av bólkinum, og tað gjørdu teir við framúr konsert í London. Ummælarar hildu, at bólkurin framvegis er í toppformi og spælir sum ein dreymur. Og tá ið teir eisini hava ein oddamann sum Steffen Brandt og eina langa røð av hittum, so teljast teir millum størstu nøvn í donskum tónleiki yvirhøvur.
Í 1981 gav TV-2 fyrstu plátuna út, hon kallaðist Fantastiske Toyota, og síðani hevur bólkurin ríkað danska samfelagið við framúr góðum løgum, speiskum, argandi og eygagóðum tekstum, sum fara longur og innihalda meira enn typiskir poppsangir gera. Teir hava tikið temperaturin av tíðarandanum, hava vent mest uppløgdu tingunum á høvdið og hava prikað bæði vanliga danan og tey, sum halda seg vera eitt sindur meira enn tey vanligu.
TV-2 hevur selt hundrað túsundtals fløgur, hava funnið nógvar heiðurslønir, og framvegis verða teir roknaðir sum modernaðir og viðkomandi fyri bæði ung og vaksin fólk. Teir hava í nýggjari tíð havt eins nógv hitt, sum teir plagdu at hava í 80’unum, og tað tekur ongan enda, um teirra kendu sangir skulu ramsast upp. Skulu vit byrja og enda onkrastaðni, so kunnu sangir sum Det Er Samfundets Skyld, Bag Duggende Ruder, Hallo Hallo, De Første Kærester På Månen, Rigtige Mænd, Kys Bruden, Kom Lad Os Brokke Os og Laternen nevnast.
Teir hava í sjálvironiskum tóna kallað seg keðiligasta orkestrið í Danmark, men tað heitið hevur staðið í stórari kontrast til teirra konsertir. Og tað verður eisin sjón fyri søgn á Summar Festivalinum komandi summar.
