Seinastu dagarnar hevur tað í løtum verið rættiliga hált ymsastaðni kring landið, og eisini í morgun ávarar løgreglan um, at bilførarar eiga at ansa sær á vegunum.
Í gjárkvøldið gleið ein bilur inni í bygdini í Vestmanna, og í gjár var eisini eitt lítið ferðsluóhapp Millum Fjarða - í báðum førum var talan um, at vegirnir vóru rættiliga hálir.
Vaktleiðarin visti í morgun at siga, at materiellu skaðarnir í Vestmanna og Millum Fjarða vóru smáir, og bilførararnir sluppu burtur úr hendingunum uttan likamlig mein.
- Í báðum hesum ferðsluóhappunum var skøðingin í lagi, men her var so hált, at bilarnir fóru á glið. Talan var um sokallað solo-óhapp, har eingin annar var innblandaður.
Løgreglan sigur, at tað er neyðugt at ansa sær í hálkuni - ikki minst tær løturnar, tá vegirnir gerast so hálir, at sjálvt bilar við góðum dekkum fara á glið.
